Ողջույնի խոսք

Ողջույն,  Ես Արտակ Անդրանիկի Ոսկանյանն եմ և Դուք բարով եք եկել իմ բլոգ: Ծնվել եմ 1980 թվականի նոյեմբերի 25-ին, Երևան քաղաքում, մտավորականների ընտանիքում:  Աշխատում եմ ՀՀ Ազգային Ժողովում`  Պաշտպանության, Ազգային Անվտանգության և Ներքին Գործերի մշտական հանձնաժողովում, որպես փորձագետ : 2010թ հիմնել և մինչ օրս հաջողությամբ ղեկավարում եմ <<Կաթնաղբյուր Գրուպ>> ՍՊԸ-ն:  Զուգահեռաբար ուսումս շարունակում եմ ՀՊՏՀ Պետական Կառավարման մագիստրատուրայի վերջին կուրսում: Երիտասարդ Առաջնորդների Դպրոցի 15-րդ սերնդի սան եմ: Մասնագիտությամբ`  Ֆինանսիստ, Կառավարիչ եմ:
Սիրում եմ շրջագայել, ակտիվ հանգիստ  ու բազմազան ապրելակերպ: Ազգությամբ հայ եմ, քրիստոնյա:

Անասելի բավականություն եմ ստանում խելացի մարդկանց հետ շփվելիս: Հենց շփման այլընտրանքային և  ժամանակակից միջոց գտնելու  հեռանկարով էլ որոշեցի ստեղծել այս բլոգը, որովհետև կարծում եմ` այստեղ բոլորն էլ խելացի ու պարկեշտ մարդիկ են, իսկ նմաններին ինտերնետում չէ` արժե ամենուր փնտրել: Հաճելի է գրել կամ զրուցել նաև ոչ այնքան պարկեշտ կամ խելացի մարդկանց հետ նույնպես, որոնք ձգտում են նմանվել, հասնել  առաջիններին: Բարեկրթորեն խնդրվում է առաջիններին հասնելու կամ նմանվելու պատվարժան ուղու վրա մնալ  ինքնատիպ, հեռու  գրագողությունից, copy-past երից ու անպարկեշտ մեկնաբանություններից: Բլոգում հեղինակային բոլոր իրավունքները շարունակաբար պաշտպանվում են: Անկեղծ ասած` վստահ եմ, որ դուք ամենը, ինչով այստեղ զբաղվելու եմ, կարող եք անել անհամեմատ ավելի յուրովի և լավ, քան ես` ձեր փոխարեն:

Ինքս լրագրող չեմ, գրում եմ պարզապես մտքերս ձևակերպված  տեսքով “գրչին տալու” և հայրենակիցներիս օգուտ տալու ազնիվ մղումով  և այդ իսկ պատճառով  վերաբերվում են զբաղմունքիս լրջորեն և խորը պատասխանատվությամբ:  Հուսով եմ, որ դրանք ինչ որ կերպ ինչ որ մեկին օգտակար կլինեն, քանի որ արդեն օգտակար են եղել  ինձ : Սիրում եմ հայրենիքս,  հատկապես  նվիրվածության, պարտավորվածության ու հարազատության  յուրօրինակ զգացումով: Ես գտնում եմ, որ հայի տեսակը բավականաչափ խելացի, բարոյական ու ստեղծոգործ տեսակ է, տարբերվող բոլոր մնացյալներից: Պարզապես համոզված եմ,  որ հային պակասում է ընդհամենը մի քանի կաթիլ` մի քանի տարբեր տեսակի այս կամ այն նորագույն գաղափարներից, ու մեկ-երկու  խաղաղ, խոշոր  կորուստներից զերծ ապրած սերունդներ, որպեսզի ազգը վերագտնի իրեն հիրավի պատկանող շուքը, փայլն ու հաջողությունը:  Բայց այս մասին  կխոսենք առանձին:

Մեկ անգամ ևս, բարով եք եկել: